ՍՐԲԱԶԱՆ ՍԷՐ

Խելագար իմ սէր

Հրեղէն տեսիլք

Խորհրդաւոր էակ

Դուն վերջին սէր

Որ գերիշխան պիտի տիրէ

Իմ ալեկոծ սրտիս վրան:

Երկունքի այս երեկոյին

Հոգիս գինով

Քեզ ունի որպէս միակ երգ

Մտածմունք, ցանկութիւն վերջին:

Օրհնուի՜ թող անունդ, կիʹն,

Լայնատարած այս աշխարհին

Ու բոլոր կիներուն մէջ:

Թող սրբազան սէրդ

Մաքրազտէ իմ գերուած հոգին,

Պատրաստէ զայն վաղուան ողջակիզումին:

Բոցավառ իմ սէր,

Կենաց աղբիւր մշտահոս,

Հոսէ՜ երակներուս մէջ

Որպէս հարբած սէր

Տարերային

Առատօրէն.

Ողողէ՜ հոգիս մեղկ

Հուրովդ ջերմ ու խենթ:

Վաղն ո՜ւշ է

Այսօր թող ըլլայ վերջինը

Երազային գիշերներուս...

Թող սրբազան սէրդ

Դառնայ մշտաբորբոք կանթեղ

Ուխտաւորի իմ անորոշ երթին...:

1985