Ի՞ՆՉՆ Է
Ի՞նչն է, որ մարդը կը կապէ այս աշխարհին,
Ինչպէս մագնիսական ուժը կը քաշէ երկիրն իրեն,
Եթէ ոչ սպասման յոյսը, հաւա´տքը վաղուան:
Ի՞նչն է, որ մարդը կը դարձնէ ազնիւ ու բարի,
Ինչպէս կրակի տակ ծեծուած երկաթը դարբինին,
Եթէ ոչ խանձող հուրը իր սիրելիներուն:
Ի՞նչն է, որ այս աշխարհը կը դարձնէ գրաւիչ,
Ինչպէս իր մարմնին հոգատար կինը հրապուրիչ,
Եթէ ոչ սա բնութիւնը՝ կախարդական, զգլխիչ:
Ի՞նչն է, որ արեգակին կու տայ ո՜ւժ՝ ծագելու կրկին,
Ինչպէս համակարգուած ջահերը ճամբեզրի,
Եթէ ոչ մարդուն ըղձանքը անոր յայտնումին:
Ի՞նչն է, որ մարդը կը կապէ այս կեանքին,
Ինչպէս մեղապարտը կը սպասէ գէթ մեղմ վճիռի,
Եթէ ոչ վաղուան սպասումը անձկագին,
Տարբեր՝ անցած բոլոր օրերէն տառապագին:
2010