ՎԵՐՋԻՆ ՓՈՐՁԸ
Չմեռաւ…
Դեռ հոգեվարք կ’ապրի.
Վերջին մարտն է ու պարտի
Յաղթական դուրս գալ:
Այս մարտին ընդմէջէն
Գուցէ շատ բաներ փոխուին,
Գուցէ ապրելու կամքը յաղթանակէ:
Ի զուր յոյսը, որ խաբած էր շատերը
Իրմէ առաջ, իր նոր փորձը կ’ընէր
Այս զոհն ալ շպրտելու:
Որքան խե՜ղճ է մարդս ու
Որքա՜ն յաւակնոտ,
Խե՜ղճ՝ իր թերութեամբ ու
Ինքնահաւան իր մտքերով,
Խաբկանքներու ալիքին մէջ մտնելու
Հակամէտ, միշտ պարտուելու յօժար
Սա արարածը, դեռ կը սիրէ հաւատալ,
Պատրանքներ հիւսել անտեղի:
Ու այս մարտը, գուցէ վերջինը,
Թող ըլլայ վերջին փորձը.
Գուցէ ըմբռնէ, ընդունի
Ու չդիմադրէ աʹլ հոսանքին...:
1983