ԳԵՐԱԳՈՅՆ ԵՐՋԱՆԿՈՒԹԻՒՆ
Երջանկութիւն կը փնտռէի երէկ.
Երջանկութիւն կը փնտռէր եւ համայն մարդկութիւնը.
Երջանկութիւն կը փնտռեմ նաեւ այսօր.
Բայց երէկէն այսօր՝ երջանկութեան զգացումը
Կը զգենու նո՜ր իմաստ ու խորք:
Երջանկութիւնը կը ծնի մարդուն մէջ
Միայն այն ատեն, երբ յաղթանակէ
Ներքին բոլո´ր տկարութիւններուն.
Երջանկութիւնը կը յաղթանակէ ա´յն ատեն,
Երբ կիրքերն ու ձգտումները կը դառնան
Չափաւոր, հարազատ, մարդկայնակա՜ն...:
Երջանկութիւնը կը մնայ երկրորդ երեսը
Մարդկային կեանքի մետալին...
Կ’իրականանայ ան, երբ մարդը
Գիտակցի´ այս պարզ ճշմարտութեան...:
Երջանկութիւնը իրողութիւն կը դառնայ,
Երբ մարդը կ’ազատագրուի ներքին բռնակալներէն.
Երբ մարդը կը դադրի Աստուածամատոյց իր մղումէն
Կամ՝ չարին ձգտումէն, ու կ’ըլլայ
Մա´րդ՝ ամէն բանէ վեր...:
1985